Wujudmu tan kasat mata
Nanging tekamu gawé horeg wong sakndonya
Ngluwihi anané perang donya
Kang nggunakké sanjata mawarna-warna
Mawa banten raga myang wutahing ludira
Nanging béda lamun anamu
Tanpa rupa
nanging nyata ana
Tanpa sumbar tanpa cecala
Mrawasa janma hanemahi roga
Tanpa wilangan kang kongsi tekèng léna
Kwawa gawé mirising menungsa
Saindhenging bawana padha ngrasa sungkawa
Mbudidaya kepriye nggone padha bisa luput saka olah krodhanira
Mawarna cara ditindakna
Murih sirep sakabèhing memala
Kang tumeka saiki durung ana titikan sirna
Hèh ... menungsa
Aja gempung aja bingung
Kabèh mau pancèn karsaning Hyang Agung
Mula piwelingku muhung
Tansaha taberi manekung
Mrih uripira tansah jinangkung
Rahayua jagad sawegung
06032020
VIRUS CORONA II
Banget ngedab-edabi anamu ngluwihi dhemit
Tanpa taha-taha menungsa mlebu rumahsakit
Polahe menungsa pating penthalit
Ngadhepi Corona si bibit penyakit
Diwedèni ngluwihi anané bom nuklir
Kabèh menungsa padha waswas kuwatir
Temah atiné kari sakmenir
Mula sinung budi kudu diulir
Olahrasa lan olah pikir
Budidaya urip resik
Tebih saking tulak sarik
Lan aja kesusu panik
Kang tundhoné mesthi ora apik
Sikep sabar darana kuwi luwih becik
Urip prasaja lan tansah mawas dhiri
Karya santosaning pracaya dhiri
Anggung nyadhong sihwilasaning Hyang Widdi
Mrih jinangkung siyang myang ratri
Angga bagaswaras saben ari
Sagung batih hamanggya ayem tentrem sejati
06032020
WONG MATI MASA WURUNGA
Nyata kridhamu nggegirisi
Kwawa nggegeter janma salumahing bumi
Kabèh samya sayuk saékakapti
Antisipasi kanggo ngadhepi
Silih awèh pituduh kanggo solusi
Mrih luput saka pangamuking Corona kuwi
Ewasemono kèh janma ora duwé ati
Mung tansah mikir dhiri pribadhi
Numpuk topèng ( masker ) krana ngoyak bathi
Ndableg nora duwé nurani
Tan mikir liyan kang bingung kepati
Apa kowé ngerti?
Lamun Gusti wus nimbali
Nora siyang nora ratri
Nora bisa disemayani
Mula aja seneng nyulayani
Bisoa tansah karya énak tyasing sesami
Marganing pati nora mung sawiji
Virus Corona mung salahsiji
Maewu dalan jalarane pesthi
Mula dipadha ngati-ati
Sumarah pasrah mring pangwasaning Gusti
Kang becik dilakoni
Kang ala dènsingkiri
Amar makruf nahi munkar jaré mbah Kyai
Kuncènana
Gedhongana
Wong mati masa wurunga
09032020
NGRESEPI
Wirama warih tumurun saka akasa
Kadi laras unine gendhing sampak
Muwuh pepes kekesing swasananing driya
Hangiring budhaling wadyabala menyang rananggana
Gumrudug tanpa larapan
Gumrunggung kadi bremara alihan
Kala-kala kapyarsa ayam jalu jejeritan munya
Kadi senggakan gerongane wiraswara
Hmmm ... saya ketungkul katrem jeruu ing panglamunan
20022020
SURYATMAJA
Muhung kwawa unjal napas jroning jaja
rikala ing pang wreksa mandira
Kukila dhandhang weh tengara
Weweh warta kingkin duhkita
saka pabaratan kurusetra
Mawar puspitarum sumawur warata tanpa sela
Dhuh jagad Dewa Bathara pangreksa loka
Teka tega hamungkasi karya sang Sinatrya
Datan maelu risang dasih atawan udrasa
Kadya dineres mijil mili ponang waspa
Surem kang bagaskara lwir kasaput warana
Nganyut-anyut gendhing tlutur kapyarsa
Humiring lepasing yitma sang Suryatmaja
Atilar dasih Surtikanthi kantaka nahen sungkawa
Dhuh dhuh nyawa gondhelana
13092019
PURNAMASIDI
Wengi sepi jinem
Ing sangisoring wit pelem
Daksawang tlenek-tlenek lakumu
Aris merdika tanpa sanggan
Tansah angumbar esem
Tulus tanpa pulasan lan ulas-ulas
Ngadhemke pikir lan pangrasa
Ora kaya wong-wong kae
Kang padha ngungal jaja
Ngumbar swara, ngetokke hawa
panyandra ala marang wong liya
Eee ... wong pangane ya padha, sega
Inumane ya padha, toya
Mbok iyaa padha ngrumangsanana
Uripmu lan uripku kuwi ana kang murba
Njur apaaaa ... sing mbokagul-agulke ki neng ndonya
Mbok ya nyawang mring dhiri priyangga
Coba keplaken pipimu, apa krasa lara?
Jiwiten tanganmu, apa ya krasa lara?
Rebut bener kuwi nora guna
Mung gawe pingget rasa pangrasa
Nyirep murub mubyare hawa kuwi utama
Laku becik luwih prayoga
Sareh sabar darana ugemana
Kae kae lho sawangen
Ing suwalik tipising mega-mega seta
Hmmm ... rembulan mesem merakati
Nora nate dredah tukaran karo lintang lan pratanggapati
Kekancan satulusing ati
Gegojegan ngronce puspita adi
Ngayahi kardi dhawuhing Gusti
Rukun salawase anggung sumiwi
Kae kae ... sawangen endahe
sumunar nyengsemi
Rembulan purnamasidi
Tuhu ngedab-edabi yasaning Gusti
102019
NGUMBAR GAGASAN
Heneng hening prabawaning ati.
Mung pangrasa tuwuh rasa samar.
Baya ta kawusanane
Nepus dirganing dalu.
Kadi peksi angebar swiwi
Mencok gigiring mega
Angulat tumurun
Saiba bungahing nala
Akekancan edhum cahya wulandari
Pinangka mitra nendra
30122019
Tidak ada komentar:
Posting Komentar